當年今日
關於我們

【唔鬥歌走去鬥枱波】邊個勁揪啲?Eason寸周杰倫係小器鬼

蘋果日報 2017/05/19 10:39

那英謝霆鋒eason陳奕迅中國新歌聲

謝霆鋒、張惠妹、巫啟賢及庾澄慶等歌手,近年喺大陸做啲音樂節目導師,浙江衛視《中國新歌聲》第二季,嚟緊7月暑期檔期播,今次搵咗陳奕迅(Eason)做導師,同樣係導師仲有那英、周杰倫、音樂人劉歡!
話晒Eason一向同周杰倫老友鬼鬼,加上網民久唔久就有人討論周杰倫VS陳奕迅,邊個先係90後華語第一歌神,相信節目會擦出唔少火花,今日網上貼出一條片,片中見Eason同周杰倫喺球桌枱上唇槍舌戰,搞到做評判嘅那英冇晒辦法。
片中見那英問佢哋邊個開波先,周杰倫笑咗一聲:「當然是新來的。」Eason彎腰擺出似模似樣嘅姿態:「謝謝!我的風格是開桿迎好運,一擊即中。」之後Eason成功打咗個波入洞,搖搖頭做出得戚表情,周杰倫就話:「哎喲!有點來勢洶洶,Eason你的戰術是甚麼,要不要分享一下。」
Eason再篤多一球:「我的戰術是……」不過今次冇中,佢尷尬笑一笑:「以退為進!」周杰倫就話:「機會來了!」之後周杰倫向住那英走過去,那英以為叫佢打下一球,原來周杰倫叫那英伸出食指同中指做架桿,點知周杰倫呢球打唔入,就扮抱怨同那英講:「那姐,又不是拍照你比甚麼手勢,俾甚麼Yeah!」Eason扮認真咁講:「杰倫,承讓了!」佢打咗個波入去,周杰倫扮要走叫那英陪佢飲幾杯,那英唔去,周杰倫就話自己一個去飲,Eason用粵語講:「買埋我哋嗰份噃!小器鬼!」
成件事都似做戲,之不過…敢公開叫周杰倫做小器鬼,除咗吹神…應該都冇第二個喇呱……