韓國人氣綜藝節目《Running Man》(RM)今日驚爆成員之一嘅宋智孝及金鐘國退出節目，雖然《RM》喺亞洲各地大受歡迎，但其實收視率已經大不如前。

《RM》於2010年開播，初期嘅遊戲設定係嘉賓及主持被鎖於韓國著名地標進行遊戲，並需於其開始營業前逃出，而最後輸掉嘅成員會被安排喺人來人往嘅地點中接受尷尬嘅懲罰，仲有最經典嘅撕名牌環節。由於設定新穎，開播時引起好大迴響，同樣受國民嘅歡迎，收視率亦不錯。

不過隨住節目形式嘅更改，收視率逐漸下滑，近年更跌至單位數嘅收視率，雖然節目組不時會搵高人氣藝人擔任嘉賓撐場，不過依然未能挽救收視率。早於今年6月，《RM》總製作人受訪時已經提及：「我哋最大嘅挑戰係突破節目內容，韓國觀眾比較挑剔，佢哋已經對《RM》好熟悉，所以我哋每一集都要嘗試新環節。我喺3個月前開始採用新嘅導演組，如果今年秋天仲唔見效果，我會孝慮換一、兩成員。」最終《RM》總製作人嘅發言成真，繼10月Gary退出後，今日就到智孝、金鐘國退出。