雷神莫雷拉重返香港做蔡約翰主帥，受到最大衝擊的就是祈普敦，他原本今季支持已經不多，主要依靠「蔡神仙」蔡約翰提供戰馬。

隨住雷神為蔡廐掛帥，祈普敦座騎數目進一步減少，剛周日（16日）坐足大半日，只策尾場「飛星凱旋」一駒，結果跑第六名，分文獎金不獲。

祈普敦今晚（19日）沙田夜賽亦只得「金如意」、「估惑」這兩匹座騎。其中，第六場三班泥地1800米的「金如意」來自目前排榜尾的蘇保羅麾下。

此駒將爭取連捷，咁啱兩人於11月14日合作憑呢匹馬贏三班谷草1800米後，之後就一齊守齋至今，可謂同病相憐。

今次「金如意」轉場地爭取連捷，的確藝高人膽大，原來12月並無谷草三班1800米，要等明年1月23日先有呢個賽程，小祈話「金如意」狀態持續勇銳，冇理由仲要等多個幾月先上陣，所以就決定轉場一博。

12月初「金如意」仲特別試咗一課1200米泥閘，直路按實隻馬仍然自動湧上第四，泥地性能似乎唔錯，佢同蘇保羅都評估過呢課泥閘後，先決定為「金如意」報名。

蘇保羅馬房一向較慢熱，但馬季跑咗三分一仍只贏得三場頭馬，表現遠遜預期，而小祈為續牌亦要爭取表現。