【特寫】
退休男士無所事事，容易感到失落迷茫？隨着人口老化數字有上升趨勢，退休人士數目急速增加，香港神託會提供一系列退休男士服務，舉辦義工活動、工作坊及劇場活動等，讓一眾退休男唔使「頴爆頭」打發時間，享受展開人生新階段的樂趣！
記者：陳潔儀

原於貿易公司擔任會計師逾30年的Peter（65歲），坦言八年前退休初期甚感不安，「以前唔算好忙，但我長期都要喺內地工作，中港兩邊走，公司亦有一盤數要睇住，有一定工作壓力；退咗休之後突然乜嘢都唔使理，心靈會有啲空虛」。
Peter其後打破困窘，正視問題，「發現人係唔可以一下子停晒所有工作，要漸進式退休；我開始搵番啲好耐冇見嘅朋友，機構邀請我參加咗好多活動，𠵱家得閒就打吓麻雀、寫吓書法同做吓義工，仲多咗時間陪太太，佢好開心。」他開懷地說，更指「其實退咗休之後，人生都可以好精采」。

「起初唔知有乜嘢做好」

曾任電子工程人員及後創業自立僱傭公司的杜Sir（59歲），經歷過事業上的高低潮，退休後又面臨人生新挑戰，「（退休初期）起初都好掙扎，唔知有乜嘢做好，就叫朋友介紹，開始做吓義工」。杜Sir人如其名，現時為中心舉辦的書法班和中國畫班的導師，教授會員及智障人士，他謙虛地說：「自己都唔算好叻，只不過自己算係社會上比較幸運嘅一群，自己識嘅嘢可以同人分享，好開心，希望鼓勵到其他人發掘自己才能。」
該服務的項目主任許恩海表示，男士在退休後須面對在家庭、生活及心理變化的調整，會於退休期出現不穩、困惑、頓悟及智慧等四個階段。
機構現時到大專院校舉辦推理遊戲及「board game」，改變大眾對「退休」的看法，並透過生活劇場到老人中心義演，及舉辦退休心理準備工作坊、搵嘢玩研究室及各項旅行活動如到大型主題樂園及看粵劇等，讓一眾退休新舊生眾首一堂，互相分享，互相勉勵，一同邁向多姿多采的退休生活。
查詢電話：2790 0711
香港退休男士服務（搵嘢玩研究室專頁）facebook網頁： http://www.facebook.com/menteam.page

社會服務
◆匿名投訴恕不處理。一經投訴，本報保留刊登權利
◆報料熱線：29290000
◆社會服務熱線：29908288
◆蘋果日報慈善基金：29908688
◆電郵：mailto:[email protected]
◆傳真：37112468
◆網址： http://charity.appledaily.com.hk