劉嘉玲今日喺上海為Valentino新店剪綵，又表示品牌特別設計嘅上海系列，部份收益會捐俾佢同梁朝偉成立嘅TLC互愛基金。

嘉玲笑言基金會榮譽主席施南生同俞琤話TLC係代表TonylovesCarina，即係「偉仔愛嘉玲」，又話暫時未有大搞籌款活動，如果有需要都會好似王菲嘅嫣然天使基金咁大搞活動籌款：「壓力好大，要籌好多先似樣，梁生唔係咁性格，朋友送嘅錢同禮物就捐去慈善機構。」基金主要幫老人同小朋友，問會唔會開老人院或教育中心？嘉玲話：「基金強壯啲，多啲錢會向呢邊發展。」

傳周潤發喺死後會捐99%身家，問嘉玲會唔會效法？佢話：「未諗咁遠，要諗，我有屋企人，嗰日到會為社會做呢樣嘢，我所有嘢取於社會，要俾返社會，好多階層要幫。」會捐全副身家？佢話：「可以嘅，帶唔走，處理晒屋企人可以捐出去。」有10億、8億？佢話：「自己無價，超過10億、8億。」同偉仔諗法一樣？佢話要商量下，但偉仔好慷慨。

嘉玲同品牌設計孖寶MariaGraziaChiuri同PierpaoloPiccioli好熟，問會唔會帶佢哋去佢開嘅夜店玩？佢話：「問咗我，如果早休息會去食大閘蟹。」又讚品牌陪佢過咗康城、偉仔拎最佳男主角嘅重要時刻。

提到今晚會同章子怡同場，點睇對方入圍金馬獎？佢話：「睇好佢，《一代宗師》做得好好，梁朝偉就一定攞啦！」想佢哋一齊攞獎？佢話：「冇所謂，好就係好，鄭秀文、舒淇係朋友，邊個攞都開心。」

對於網友發起11.19台慶熄電視，阿叻陳百祥豪語如果收視2、3點就死咗佢，嘉玲話：「我同佢唔同，對無綫有感情，係搖籃，係母親，唔想佢死，希望加強製作，update下，有啲沈悶，有啲舊，要改良。」佢就少睇電視，多數睇資訊台，會唔會返無綫幫手？佢話成日返去參與台慶、港姐。至於拍劇？佢話：「拍劇就唔好，冇咁多時間。」