【新增影片】
利記名宿加歷查最近出嚟抽水，話如果畀哥迪奧拿做曼聯領隊嘅話，曼聯應該可以拎到英超冠軍。好多紅魔迷或者會覺得加歷查亂噏，「粗暴干涉他國內政」，但睇返今仗主場對聖人嘅比賽，就會見到摩連奴麾下嘅紅魔戰術單一，淨係識打燒味戰術左右傳中，即使畀十個迪布尼你，到頭來都係無用武之地。

其實聖人防守唔勁，近四場聯賽已經失咗11球，點解紅魔坐擁保羅普巴、米希達利恩、桑馬達呢啲攻擊手都入唔到波？原因好簡單，無論有咩球員喺手，摩佬都會先求穩守，再組織進攻。而今場嘅進攻方式就係喺邊線推進，勞基梳爾、艾舒利楊格、米希達利恩輪流出波入禁區，希望禁區會有人頂得中，博大霧入一兩粒。但呢個方法明顯唔得，好多高波畀聖人中堅韋斯利凱特頂走晒，紅魔根本無啖好食。

開波早段紅魔的確有打開紀錄嘅機會，弱隊殺手盧卡古差啲以頭槌先開紀錄，但之後就同聖人守將頭撼頭傷出，要由拉舒福特入替。福仔嘅入場為紅魔嘅攻力增添生氣，佢試過喺中場策動反擊連過兩關，形成三打三局面，再傳波畀米希達利恩，最終畀後者浪費機會。即使福仔上半場表現活躍，一落場就有15次觸球，但紅魔始終組織唔到似樣嘅攻勢，始終無法破門。

而講返紅魔個別球員嘅表現，米希達利恩真係冇咩作為。佢的確喺左路出過幾次波又試過射門，但鑊鑊都離行離迾冇次中，仲浪費一次三打三嘅得分好機會。雖然好肯回防，但MK仔個賣點始終係傳送同埋進攻能力，今場繼續隱形難怪會畀摩佬早早換走。

一月轉會窗就開，摩佬最近仲暗示唔夠錢使，實情向球會高層施壓，希望佢哋可以開水喉。但其實摩佬買親嘅都係貴價貨，艾歷拜利、保羅普巴、尼曼查馬迪呢啲全部都係貴嘢嚟，「唔夠錢使」呢個論點似乎唔成立。況且就算基沙文真係加盟，但只要摩佬一日喺度，紅魔嘅戰術都唔會變，到時呢位法國翼鋒可能仲會畀人嫌冇防守，話唔定會被改造成為第二個華倫西亞同埋艾舒利楊格!

文：聰鳴
----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM