求驗客手記:獲葡體會續約一年
歐冲FIGHT

蘋果日報 2015/06/25 00:00


唔使「等埋發叔」,約已續!去季護級失敗嘅葡萄牙體育會,禮拜二公佈同陣中前港足隊長歐陽耀冲續約一年。來季將會隨隊征戰葡乙嘅歐冲,深信將會獲得更多上陣機會,並揚言要盡量入波,以表現爭取重返港足!
香港足壇現時唯一土生土長喺歐洲落班嘅球員歐冲,去季雖然要去到煞科戰對奧漢倫斯先有機會後備披甲廿幾分鐘,但佢月初返港後話過,來季肯定會繼續喺海外球會效力。直至香港時間禮拜二晚,終於有歐冲嘅消息,葡體會喺球隊官方facebook公佈,已經正式同歐冲續約,仲大讚呢位前港腳喺比賽同埋訓練中證明佢嘅表現㖭。
望重返港隊踢世盃外
年僅25歲嘅歐冲亦喺佢嘅官方fb專頁轉載呢個消息,仲留言:「我會繼續努力,盡我所能,我要入波!」換嚟600幾個like之餘,仲有唔少球迷留言,話要團購佢件波衫㖭。因為葡乙係葡萄牙第三級別聯賽,所以歐冲都相信自己有能力爭取更多出場機會,仲下定決心要重返港隊︰「今年目標就係要爭取更多出場機會,最好就入埋波,希望返嚟代表港隊出戰世盃外!」
歐冲今次返港度假都冇偷懶。除咗搞掂咗良民證同拎番份冇犯罪證明紀錄外,最重要係醫番好個高低膊,「我上年去葡萄牙之前已經有呢個問題,但因為喺嗰邊不停做gym,令問題惡化,所以返嚟後一星期去做兩、三次針灸,比紋身仲痛10倍!」歐冲又話,醫師雖然勸佢治療期間唔好做gym,但一年內增磅10公斤,化身為大隻仔嘅佢笑言都係忍唔住,間中仲會搵埋新任飛馬領隊文彼得一齊舉鐵,裝備自己。
歐冲透露,下個月頭就要返去葡萄牙操練,準備八月二號開「咧」。佢話今年心情唔同咗,好想快啲返去準備,但留喺香港呢段日子,就會盡量喺屋企陪家人,飲多啲靚媽煲嘅湯。
識睇,一定係睇足英台【英波Live】:
http://soccer.appledaily.com
http://bit.ly/engballlive