吳君如、方中信、吳鎮宇主演電影《妖鈴鈴》噚晚喺金鐘舉行首映，君如爸爸夏春秋、細佬吳君祥同女友江美儀齊齊現身，仲有好友鄭秀文、王菀之、農夫等。首映儀式進行期間，君如講述為何想執導，因為一直想做驚嚇片加笑片元素，電影海報上鎮宇一頭柔順頭髮，被方中信笑佢造型似足謝霆鋒咁靚仔。而方中信就係禿頭look，鎮宇講笑話：「佢明明做緊生髮代言人，整到個頭咁。」方中信自嘲：「唔續約啦人哋。」君如笑方中信今年驚濤駭浪。

方中信同吳鎮宇近日忙跑宣傳，鎮宇聖誕未能享受家庭樂，佢話：「除夕要交番條數出嚟，唔係下年除夕都唔使過。」方中信戲中禿頭造型大犧牲，鎮宇又要黐假髮，大家開工時都會互呻，鎮宇仲話拍完呢套電影後有夜班恐懼症，兩人希望獲得好票房作補償。

其間吳君如穿上一件戲服嘅袍，鄭秀文仲將個鈴吸落君如胸前。君如為咗拍呢套電影碌盡情人卡， 佢話：「拍咗咁多年電影，嚟得撐我嘅都係情人，每次拍戲都咁多情人出手好感動 。」君如仲叫大家有乜需要即管出聲，呢行情義兩心知，私下同Sammi都好朋友，但冇機會合作，大家經常聯絡互相支持，仲讚Sammi係義氣仔。佢仲爆戲中整到方中信禿頭，成日都俾對方女fans鬧，君如話：「我係小學雞導演，好多問號，我同佢哋講得最多就係信我。」 有冇考慮搵daddy客串？君如話：「冇合適角色，佢成86歲，唔好搞喇，喺屋企行行企企打下麻雀，支持下亞視咪得囉。」

有報道話君如畀咗張無上限信用額信用卡畀老豆夏春秋，君如話：「冇上限嘅卡畀咗佢好耐，但老人家好慳錢，冇辦法係佢哋捱出嚟嘅性格，睇完都嚇一跳從來都冇用過呢張卡，一直佢都係用緊以前做六合彩私己錢，我懷疑佢真係中過六合彩，冇理由張卡未埋過單。」

另一說法就話君如有三億身家，君如話：「唔好講呢啲啦，我睇完報道都話陳可辛收埋咁多錢，經過多年穩陣投資，唔係四處揮霍，今次電影搭過境都二千萬，陳可辛都話我不知天高地厚，我三年冇搵過錢，《金雞》、《12金鴨》、《妖鈴鈴》我一個仙片酬都冇收過，希望呢套電影可以收幾個億，咁我身家就唔止三個億啦。」報導仲有君如迷信點香塔，君如話：「其實都係好傳統做法，呢個係香港獨特文化，點開順利咪點囉，心安理得，可以保家人平安開心，我點咗好多年，你話我迷信又好乜都好啦。」

更多娛聞，喺晒《娛果》
http://fb.com/appledailyent