青年新政喺區選憑鄺葆賢贏咗一席之後，即刻成為政界新星，仲話連官員都搵佢哋交流，佢哋亦食住個勢，話明年2月新東立會補選、立法會選舉都唔會缺席。呢個組織家陣咁紅，又係本土派，江湖流傳教主黃毓民都覺啱key，想拉攏佢哋結盟。八方問過教主，佢話冇諗呢樣嘢，但青年新政就冇關晒門，話志同道合就有合作空間。

青政不否定有合作空間

有傳教主區選後想重整本土力量，青政喺區選咁有表現，教主梗係想搵佢哋加盟，加上教主個網台MyRadio噚日有個節目搵咗游蕙禎做嘉賓，難免令人覺空穴來風，未必無因。
八方搵毓民求證，佢話冇諗過同青政結盟，強調有後生仔出嚟從政，佢會樂見其成，話可以幫就幫。講到新東補選，教主就好有意見，話青政得萬幾票，吹到咁大，夠唔夠條件同人討價還價先？但教主都認同，唔可以畀泛民閂埋門決定新東補選，要同後生仔傾；至於係咪支持搞泛民初選，教主一句話：有乜咁新鮮？當年就係佢發明初選，解決勞永樂同陳太選立法會個爭拗。
青政又點睇同教主合作？召集人梁頌恒同八方講，今年6、7月左右同毓民見過面，聽佢分享選舉同落區經驗，之後已經冇乜見過。至於將來係咪有合作空間？梁頌恒覺得好難一概而論，主要係從每件事、每個議題去考慮，總之志同道合嘅人都有合作空間。

李八方
mailto:[email protected]