當年今日

升班戰射12碼畀水晶宮
球驗客手記:新特蘭倒灶怨運滯

蘋果日報 2004/05/19 00:00


新特蘭領隊麥卡菲都算黑仔,喺星期一場英甲升班附加賽次回合,本來主場領先水晶宮二比○,加埋對手有中場丁格雷在主場前五分鐘出場,可謂形勢大好;點知臨完場前俾水晶宮後備入替嘅包維頂入,變成二比一,連同首回合打和四比四,要加時。喺加時期間水晶宮仍然頂得住,重互射十二碼贏埋㖭,可以同韋斯咸同葉士域治嘅勝方爭升班。
其實,如果場波係有計作客入球嘅話,喺首回合作客輸畀水晶宮二比三嘅新特蘭,就算係保持次回合二比一嘅戰果,都已經晉咗級啦。另外,麥卡菲喺佢嘅領隊生涯期間,先有九三/九四球季帶領米禾爾打英甲升班附加賽,喺被一致看好下輸咗畀打比郡;○二年世界盃決賽周,佢帶領愛爾蘭又喺互射十二碼畀西班牙淘汰。真係嘆句:命運弄人!
由於新特蘭負債逾二千萬鎊(約二億八千萬港元),佢哋𠵱家升唔到班,陣中班高薪球員嘅前途咪話唔危囉。

希斯基賣畀伯明翰最值錢紅軍棄將
原本值一千一百萬鎊嘅希斯基,噚日由利物浦以三百五十萬鎊(約四千九百萬港元)過檔伯明翰,若佢喺伯明翰嘅上陣場數達某數目,利物浦可執多二百七十五萬鎊。係人都知利物浦想賣走陣中瘀血球員,但弊係好似捷奴、戴奧及迪奧夫咁,全部有價冇市,所以希斯基初步賣到呢個價,算係唔錯。
梅度春光乍洩無端做四級片主角
梅度都算黑得交關,繼被傳會俾車路士賣走後,日前重衰鹹濕。話說梅度帶曾經係名牌三級書模特兒嘅女返屋企「合皮」,點知個女仔玩偷拍,重將餅帶賣畀地下四仔市場㖭。梅度事後話唔信個女仔係咁嘅人,重話如果係就同個女仔斷絕來往。梅度揩咗嘢都唔識醒啲,睇嚟下次又會俾人偷拍多一鑊。

佐敦早到北京傳媒球迷懵然不知
原本話噚晚先到北京嘅「波神」佐敦,突然提前出發兼冇通知,前晚九點幾就飛到去北京;因為「一剔牌」之前話佐敦十八號先到,所以機場幾乎冇球迷恭迎飛人降臨。最好笑係中國幾個大網站都喺網上整咗條banner,倒數佐敦重有幾耐到,點知倒數到二十幾個鐘,飛人就「提前」嚟咗,得啖笑。