【跑馬地】李克勤前晚撇低太太盧淑儀和囝囝駕車出外吃飯，竟被一外籍男士泊車時撞花其座駕，事後對方完全當沒事發生，未有道歉，令克勤又無奈又嬲嬲豬。
前晚11時許，克勤駕駛其Toyota七人車前往跑馬地南亭與友人食消夜，落車時克勤見到有記者在場，亦大方打招呼，繼而走入食肆與友人會合。其間一位駕駛白色瑪莎拉蒂的外籍男士欲將座駕泊在克勤七人車後，但未知是斜路泊車有難度，還是車位太窄及技術問題，該外籍男士泊車時先撞到泊在後面的Audi，繼而再撞向克勤的七人車，將七人車撞花。最離譜的是，該外籍男士先後撞到兩部車後，完全未有落車查看，反而着車上朋友先行落車，然後再泊往隔籬位置。

臨走苦笑

現場目擊過程的記者，第一時間通知克勤，他隨即走出來查看，惟該外籍男士完全當沒事發生，落車後走進隔籬酒吧消遣，克勤惟有無奈走到七人車處檢查「傷勢」，並極無奈地說：「小事、小事！算喇，只係條氣有少少唔順，係咪洋人嚟㗎？我都識操洋語喎！」其時克勤友人亦從餐廳走出來了解，克勤笑謂：「唔使驚，我哋有個總警司喺度。」並表示最嬲對方連一句道歉也沒有，說罷折返餐廳，再逗留半小時便離開，臨走時克勤再苦笑說：「走喇！走喇！再唔走驚人撞爛我架車！」
採訪、攝影：朱志聰、梁繼光