建制派立法會議員何君堯去年9月喺反港獨活動上發表「殺‧無赦」言論，引起軒然大波，隨後更被揭發佢喺2016年參加立法會選舉時，喺單張自稱「新加坡、英格蘭及威爾斯執業律師」，卻冇喺兩地執業，有虛報資料之嫌，唔少民主派政團同市民其後向廉署舉報，話佢涉嫌違反《選舉（舞弊及非法行為）條例》，要求DQ佢嘅議員資格。事隔近一年，律政司話證據不足所以唔作檢控，換言之，喺法庭selfie都冇事嘅何君堯，又再次大步檻過咯。

據了解，幾名曾就何君堯虛報資料作出投訴嘅人士，近日都收到廉署回覆，話經調查後證據不足，唔作檢控。八方都問過廉署，發言人證實早前接獲有關何君堯嘅投訴已經完成調查，並向律政司徵詢法律意見，律政司認為證據不足，決定唔向涉案人士作出檢控，廉署亦已喺上月25日就有關調查向獨立嘅審查貪污舉報諮詢委員會匯報，委員會都同意廉署嘅調查結果喎。八方問過其中一名投訴人、荃灣區議員譚凱邦，佢確認收到廉署信件，對於結果感到無奈。
其實何君堯獲放生，唔係第一次。之前佢喺法院自拍，惹嚟爭議，但律政司最終都決定不提控，當時連司法機構都發表聲明，重申一貫政策係除非獲得許可，否則一律禁止喺法院大樓範圍拍攝。

李八方