代理界早前放風話有意加佣，噚日美聯開記招，專登提記者話集團主席黃建業會講吓佣金收費，唔通真係成事？點知揭盅係黃主席話業界仲未達成一致意見，遲啲再傾，而美聯就決定1年內唔加佣。
本港嘅代理佣金，係買賣雙方各收樓價1%，黃建業指比起英國同澳洲嘅2.5%、美國嘅5%，實屬偏低，而且香港代理仲不時要面對公眾壓力，值得研究吓嘅佣金合理水平。佢補充舊年市場有12萬宗買賣，逾九成由代理促成。

部份代理叫加實減

咁點解業界又講唔掂數？中原地產執行董事陳永傑一針見血講出原因──過去幾年係買家市場，代理根本無牙力加佣，所以雖然傾過呢個問題，但最後都係不了了之。
佢仲話𠵱家一手買賣係買家免佣，代理只收發展商單邊佣；屋邨樓就1.5至2%，豪宅就2至2.5%。至於二手市場，買賣各1%，但有啲舊樓或者新界幾十萬嘅樓仔，業主好多都肯加佣最少1.5%，試過有業主畀到3%㖭；而買家有啲會同代理講數，畀唔足1%。
香港地產代理專業協會副會長鄧意民話，行內人梗係想加佣，但競爭咁大難實行。其實有啲代理口講加佣，但私底下就減佣。佢認為代理商會若聯合一齊去加，直情係同講求反壟斷及公平嘅潮流大勢相違背；因此該會唔支持聯合加佣。
電郵地址：[email protected]