新加坡經多年積聚，GIC（政府投資公司）擁資極多，係新加坡往海外投資嘅先鋒，除咗GIC之外，不少新加坡國企配合，周圍搵投資對象，最近報紙講新加坡有意入股南京祿口機場，談判已到最後階段。講開機場，內地消息靈通人士提供消息，佢話不久前香港機管局入股杭州蕭山機場，作價不過不失，但係杭州環境好，貨運生意求過於供，只要香港機管局能夠在管理方面有貢獻，提高杭州機場「生產力」，機管局肯定係入咗筍貨！
至於機管局點解咁醒買咗件好嘢，消息靈通人士有好料，佢話：「其實新加坡吼咗杭州蕭山機場好耐，派人與浙江杭州有關人等傾談，差唔多開始咗兩年大家一路拖拉，卒之可以牽手仔，進入談婚論嫁階段，其後新加坡邀請杭州機場去新加坡參觀樟宜機場，希望以樟宜機場嘅陣勢、效率嚟打動杭州，肯簽婚約。唉吔，到咗講落文定嘅最後階段，李顯龍竟然去咗台灣訪問見陳水扁，北京當堂震怒，下令所有官員唔准去新加坡，於是單deal臨時甩拖，埋到龍門口射波出界。香港見有可乘之機，立即展開追求，卒之咪掂咗囉！」原來買杭州機場股權有段古，呢位經常穿梭內地嘅消息人士又講到好似真嘅一樣喎。如果係咁，北京餘怒未消，新加坡會唔會買到南京祿口機場呢？