波士頓馬拉松爆炸案震撼全球，財爺曾俊華對呢宗案件亦有特別感受。財爺噚日喺網誌披露，馬拉松終點所在嘅Copley Square，係佢同太太黃蓮華後生嗰陣經常去嘅地方；上周四其中一名疑犯又喺佢母校麻省理工學院同警察駁火；難怪成件事令佢咁感慨。

七十年代住波士頓

財爺噚日以「山雨欲來」為題寫網誌，指呢個月全球好多地方有事發生，塞浦路斯財政問題、北韓局勢緊張、歐美經濟、內地H7N9禽流感全部都可能影響香港、甚至全球經濟穩定。
加上波士頓馬拉松連環爆炸案同德州化肥廠大爆炸，造成嚴重人命傷亡，令到呢位喺美國讀高中、大學同埋進修嘅財爺感受良多。
佢以往喺網誌上時不時都會提起太太，例如話一齊去睇藝術表演、睇戲呀咁，原來七十年代佢喺波士頓生活（佢喺波士頓州立學院取得雙語教育碩士），而馬拉松終點所在地，就係佢同太太經常去嘅地方。
財爺執筆同出稿之時，大概未知道四川再發生七級大地震，導致過百人死亡，呢篇比較灰嘅網誌未有提及呢單天災，否則，調子可能更灰。
今年四月差唔多日日陰天、落雨，全球各地咁多事故同災難，本港又有一班碼頭工人冒雨瞓街，一家大細走去首富李嘉誠大宅門口示威都冇人理，確實令人倍感納悶。

李華華
mailto:[email protected]