利嘉閣董事伍洽強指出，目前好壞消息充斥，短期內樓市一定有衝擊，近日有人蝕錢都要劈價散貨，但始終利好因素多，長遠而言，樓市仍會平穩發展，估計第4季樓價不會大上大落。對於最近有投資者寧願蝕錢也要出貨，他認為，只是市場將短期衝擊放大，其實投資者出貨，同樣亦可理解為換貨，尤其是樓價升過97物業，有可能會借勢回落，不少投資者都會趁樓市仍處高位沽貨套現，將資金再投向低水物業。

伍洽強稱，由於大部份豪宅樓價已升過97，保守估計樓價未過97的中小型物業，在年底前至少仍有5%升幅。他個人十分睇好鐵路沿線物業，大路選擇有流通率較高的太古城及美孚新邨，但太古城入場銀碼動輒400萬元，貪平可選擇呎價仍徘徊在2,000餘元的天水圍嘉湖山莊。另外，近年發展成熟的將軍澳區，由於坐擁鐵路優勢，加上區內樓齡較新，2房樓價僅300餘萬元，故每月成交量不少，同樣值得投資者考慮。對於近期熱炒的細價樓，他認為，簡直有如仙股般大上大落，由130萬元開始一直炒上，曾急升逾200萬元，近期跌落150萬元，「如果你頂得順，咁咪玩囉！」