當年今日
關於我們

【梁浩賢馬上睇】貳寶有一級賽實力

蘋果日報 2013/08/27 06:00

梁浩賢貳寶

大摩去季雖有「旗幟鮮明」、「風花雪月」及「步步友」幾匹澳洲P布自購馬成功上位,但亦有上過陣而未有表現的,「貳寶」正係其中一匹。

「貳寶」父系Haradasun是前悉尼唐加士打一哩錦標、英國女皇安妮錦標等三料國際G1冠軍,屬澳洲近年罕見的國際級中距離好手,子嗣「愛將」去季在本港四戰三勝;母線方面,「貳寶」母系Tarlaquena曾上陣無功,其他母系家族成員多係早熟中短途材,1000至1600米都啱發揮。計血統,「貳寶」係中短途馬,1200至1600米乃射程範圍。

過往大摩絕少引入活侯夫人訓練過嘅馬,但「貳寶」來港前偏偏就係由活侯夫人訓練,此駒喺澳洲七戰獲兩冠三亞,兩勝贏馬路程分別係1000及1500米右轉賽事,其中1500米嗰仗係玫瑰崗二級賽史丹福錦標。查「貳寶」兩歲第三次上陣時已喺昆士蘭鷹園1600米G1施密夫錦標入Q,踏入三歲首戰更即刻喺考菲爾德1200米G3壓倒費明頓新市場讓賽冠軍「特快班車」跑第二,之後參加G1金玫瑰錦標雖無功而回,但亦只輸三個馬位左右畀穆罕默酋長雙雄「榮譽肩章」、Albrecht跑第五。兩星期後,「貳寶」就喺史丹福錦標反勝Albrecht掄元。

綜合上述各仗賽績,「貳寶」實力大致值「榮譽肩章」、「特快班車」等上一年度澳洲三歲G1頭馬相若級別,來港後評90分,就算唔係大超級都起碼夠贏一至兩W。上季抵港後兩戰無功一來進度未夠,二來兩仗都揀田草1600米上陣,部署完全唔啱路,賽績上從未反映真正實力。不過,「貳寶」上季兩敗已令佢評分減咗四分,今季將喺86分起步,開操後近日已見開始快跳,備戰動態漸趨積極,值得留意。