邊個話80後淨係識仇富仇商、憤世疾俗？有個美國留學女生噚日喺報紙登全版廣告，用洋洋千字撐李嘉誠嘅慈善事業，仲以誠哥嘅財富觀為「人生指南」，簡直係年輕人積極向上嘅典範。八方望塵莫及，冇錢留學嘅憤青學吓嘢喇。
噚日《明報》呢個廣告，標題係「美國看李嘉誠先生的慈善行動與理念」，仲以為係咪美國領事登報，原來係自稱香港青年嘅芝加哥大學學生會前副主席楊嘉美。

老竇喺吉林做生意

楊嘉美話睇到「少數香港媒體」對胡錦濤單獨接見誠哥有激烈反應，感到「萬分驚訝」，對誠哥好唔公平。佢質疑美國富豪捐錢係想避稅，唔似得誠哥真心造福社會。佢提到誠哥獲香港商業獎頒發終身成就獎，仲話係「Victor」代誠哥領獎，八方諗咗兩諗，原來係講緊李澤鉅。楊小姐讚Victor致謝辭言簡意賅，形容係「讀書人的得體回『憶』」。佢「應」字作「憶」字，手民之誤，實百密一疏。
翻查資料，楊父喺吉林做生意，嘉美18歲就秉承誠哥樂善好施嘅精神，將自己嘅獎學金捐畀吉林窮學生，仲親身去教英文，獲當地傳媒表揚。楊小姐仲係大中華攝影學會青年部主席，唔講唔知，梁振英同曾鈺成都係個會嘅名譽會長。