曼聯中場保羅普巴今日訪港，佢係球壇其中一名高薪球員，周薪29萬鎊，計番年薪有1,508萬鎊，兌做港紙，佢一年剩係份波糧已經有1.5億。

一年賺1.5億係咩概念？正當大部份香港人月薪萬幾蚊，日薪幾舊水嗰陣，普巴嘅日薪係41萬港紙，每粒鐘賺緊萬七蚊。香港嘅人工中位數係每月1.5萬，而普巴嘅月薪係1,250萬，換言之，一個香港普通打工仔，做足70年左右，先至賺到普巴一個月嘅人工。假如你做咗港版普巴，你可以做到啲咩？如果你拎晒份糧去買iPhone 7，你一年可以買到2.6萬多部手機！又拎樓盤海之戀做例子，海之戀最平單位盛惠559萬。普巴周薪289萬港紙，換言之，你唔使兩星期，份糧就夠一筆過買起一個海之戀單位。