鄭嘉穎和周麗淇（Niki）的五年地下情，盛傳隨佘詩曼介入而告終。他和舊愛Niki昨日被問及情已逝的態度卻大相逕庭，男方聞阿佘一臉風騷，Niki則神色憔悴，揚言「冇乜嘢好講」，輸家兩字盡寫臉上。

昨日有消息指39歲的鄭嘉穎和比他年輕十載的周麗淇五年情玩完，導火線是佘詩曼介入。嘉穎和阿佘過往曾三度合作拍劇，包括《花樣中年》、《YummyYummy》和《法證先鋒II》，有傳二人去年拍攝《法證先鋒II》時，男方已對33歲的阿佘嗒糖，但當時阿佘和吳卓羲打得火熱，所以嘉穎未有進一步行動。
其實Niki與嘉穎拍拖期間，也曾跟布廠少東兼莫少聰外甥Jordan交往，此事令嘉穎對其熱情度冷卻，另一邊廂的阿佘早前又發現吳卓羲過於大使而掟煲，並與嘉穎撻着，上月嘉穎和Niki生日，雙方各自慶祝牛一，甩拖早已有迹可尋。

嘉穎胃口好消夜

嘉穎有新歡，被飛的Niki獨憔悴，昨日她穿上一身黑色衫褲、佩戴大墨鏡往商台錄音，一臉憔悴，笑容欠奉。對於阿佘介入導致情變的傳聞，問Niki是否受到很大刺激，她說：「唔係，只有愕然有咁多記者喺度。」問Niki是否相信嘉穎和阿佘擦出愛火，她答：「我啱啱先知，等我了解咗件事先，冇乜嘢好講。」
但其樣子甚憔悴，Niki只說：「我日日通告好早，零六零八好攰。」有傳Niki心情不佳曠工，她否認此事，問她知否嘉穎與阿佘相熟，她已不回應。
至於嘉穎前晚先後在九龍城及九龍灣繼續拍攝無綫新劇《烈火雄心III》外景，與胡杏兒和王喜拍攝文戲，現場見嘉穎心情不俗，胃口大開，凌晨時分還吃麵消夜。至凌晨近3時收工離開，在場記者問嘉穎是否搭上阿佘？他竟然笑容滿面，風騷地說：「聽日先問啦，𠵱家唔好問啦，早啲收工啦。」

周汶錡劃清界線

陳豪和周汶錡（Kathy）昨日到中環出席HTC手機發佈會，對胞妹甩拖傳聞，Kathy說：「無聊！又傳呢啲，每個人係獨立個體，我都唔知乜事，只係同公司拍戲，男方又未有女友先惹來揣測，呢啲花邊新聞唔關我事！」此外，記者昨曾致電阿佘，但未獲回覆。
採訪、攝影：娛樂突發組、王連連