陳奕迅（Eason）近日客串拍咗部大陸電影《閃光少女》，內容講校園樂團嘅熱血音樂故事，有個女學生因為俾校草飛起，決心搞好樂團威俾舊愛睇，而Eason扮演嘅角色，造型夠晒騎呢。

雖然Eason唔係主角，但今日佢都現身觀塘出席慈善首映晚會撐場，佢喺台上介紹部戲：「我扮演教育局領導，去到一間學校視察，學生分成兩批，學西樂嘅學生着得好高貴，學中樂嘅學生着T裇，好似畀人睇低一級！我去視察時兩批學生用英文歌比拼，當日睇劇本已經覺得好吸引。」

Eason話呢幕戲只係兩分幾鐘，但好過癮：「自己接呢部戲，原因係想推動大家思考中西樂器，香港好多學校教西洋樂，自己去英國留學，喺唐人街先到機會接觸到中樂，呢部戲係好好機會畀大家思考，家長可以帶子女去睇，自己都會帶屋企人去睇。」Eason仲喺台上試玩中樂樂器，樂手教佢彈do re mi。

同場嘅麥貝夷着鮮紅低胸露背裝現身，問到點解着得咁性感？佢自爆借助道具裝「胸」作勢話：「因為襯番主題紅色，咁啱屋企有呢條裙，當然要有嘢幫助下，先有呢個效果，大家見咗我咁多年，知我材料有幾多。」記者笑佢樣有啲唔同咗，問係咪去過旅行？麥貝夷笑醒目答：「有去旅行，不過去韓國係十年前，近排返大陸做嘢多。」