周大福（1929）第5年舉行珠寶拍賣會，執行董事鄭志剛（Adrian）一向都會留番套心頭好畀老婆，今次都唔例外，預留咗對耳環畀佢。適逢11月，唔通當係結婚7周年禮物送畀老婆？
Adrian留畀太太嘅嗰對耳環屬「環琇光華」系列，成套首飾連埋頸鏈、戒指、耳環同手鏈，但佢淨係揀咗對自己都有份設計嘅耳環畀太太，價值幾多就冇透露喇，不過對耳環用18卡藍光面蛋白做主石，襯上鑽石、藍寶石同碧璽，再配合18k白色黃金鑲嵌而成，由多層呈半圓鑽石環環相扣，介紹員話好似一條通向未來嘅時光隧道咁喎，相信價值不菲。

拍賣會最貴頸鏈值5球

查實，周大福自2011年上市嗰年就開始搞珠寶拍賣會，今年拍賣會將會喺聽日舉行，主題係「凝光臻藝」，畀VIP同貴賓競投珠寶，15套價值連城珠寶首飾系列中有13套會拎出嚟拍賣，其中有4套仲係Adrian有份參與設計喎。
今次最貴嗰套首飾叫「聲光流泉」，由全鑽石做成，淨係條頸鏈估計價值就要480至560萬港元，用咗5卡尖形鑽石做主石，再配18k白色同黃色黃金鑲嵌而成展翅造型，長方條形設計靈感就來自琴鍵，唔單止搖擺時會有悅耳嘅聲響，離遠睇都bling到華華要戴黑超咁滯，到時唔知會由邊位富豪投得呢？

李華華
mailto:[email protected]