唔知大家有否發覺，近季好多馬房都安排馬匹跑完又跑，當拿起排位表會發現熟口熟面，所唔同可能係配搭、檔位，咁到底跑得密係咪一定演出好？

呢樣就要視乎練馬師係咪求減分，最終當然要講求練馬師功力，事關跑得多馬匹未必受得住。暫時計，今季最善用呢招係方、苗兩個馬房，不同之處係前者贏的多數係熱門，後者就專贏冷門。

苗禮德現時五W，四W係谷草贏，「萬醒仔」一周前谷草1800米跑包尾，七日後縮至1650米即贏馬，「至尊飛星」相隔七天由跑第八變跑第一，有16倍收穫，「金錢路」相隔11日更由尾三變第一。後晚（26日）第二場苗廐「萬醒仔」又再跑，有賠率小心回馬槍。

至於方嘉柏的「同進」、「想贏就贏」、「通勝」相隔十零日再跑。以陣上走勢計，後晚第四場「同進」上仗沿途蝕但造全場最快末段追得勁，至於同晚第五場「想贏就贏」贏完增程雖冇根據，但五歲大熟馬房敢如此部署，點計都可以循好方面看！