美國印第安韋爾斯網賽雲集各路高手，可謂場場好戲，其中德國2號種籽姬芭啱啱先趁莎蓮娜退賽，喺20號公佈嘅最新一期世界排名會重返一姐位，點知話口未完就喺16強以直落兩盤3:6輸畀俄羅斯14號種籽維斯蓮娜出局，認真唔老嚟，維斯蓮娜喺8強就會火併同日擊敗彭帥嘅「大威」威廉絲。另外，梅古露莎、禾絲妮雅琪同文丹露域等同樣躋身8強。

ATP方面，拿度同費達拿喺周二分別淘汰華達斯高同史堤夫莊遜，將會喺16強上演澳網決賽翻版！至於祖高域更早喺第3圈就要火併迪樸度，最終呢位2號種籽以7:5、4:6、6:1贏波，16強惡鬥澳洲「壞孩子」基傑奧斯。