朱慧敏同樂瞳今日出席亞視數碼媒體有限公司成立典禮，佢哋將同曾華倩一齊主持每周三播嘅節目《今晚見》，不過每日都有唔同主持講其他嘅話題，朱慧敏、曾華倩同樂瞳主持嗰部分主要講fashion扮靚，提供時尚知識，有時會講吓飲食，預計一月就會播出。

朱慧敏話今次亞視俾咗好大自由度，自己拍到呢個節目都好開心，心情都興奮到瞓唔着，見一班管理層都係睇住自己大，好似有陳志雲、何麗全，佢解釋：「何麗全係當年我喺加拿大選港姐，係佢帶我返嚟香港，自己今日可以同佢哋共事，我覺得好感動，好似十兄弟歸位咁。」問到今次薪酬如何?樂瞳直言好滿意，仲話加咗好多人工。

講到之前亞視有拖糧嘅「前科」，擔唔擔心冇糧出，朱慧敏稱完全冇諗過，自己都充滿正能量，喺亞視發揮自己嘅演藝事業，可以發光發亮，o依家就算有其他台邀請佢拍劇都冇問題。

樂瞳對呢個電視台好有信心，o依家係一個良性競爭，喺亞視冇簽藝員合約，主要係幫佢哋主持呢個節目，可以喺唔同平台亮相，自由度好大、好舒服。

更多娛聞，喺晒《娛果》
http://fb.com/appledailyent