2017年度另一張樂壇成績表——商台叱咤頒獎禮今晚假座會展舉行，今
晚將頒發43個獎，而「叱咤樂壇我最喜愛的歌曲」最後五強亦已公佈，包括：

ToNick《長相廝守》
方皓玟《假使世界原來不像你預期》
李克勤《失魂記》
胡鴻鈞《朋友身份》
陳柏宇《霸氣情歌》

賽果今晚由現場觀眾以一人一票形式投選。

頒獎禮由今晚8點開始舉行，至凌晨12點，長過無綫《勁歌》總選一個鐘。ViuTV會延遲半小時轉播。

年年大家最期待都係叱咤，咁今晚又有咩睇？

1.「削骨還父」胡鴻鈞憑《朋友身份》殺入「我最喜愛歌曲」五強，吳業坤同JW嘅《原來只因深愛著》同許廷鏗嘅《神奇之旅》都出局。憑胡鴻鈞嘅人氣，真係分分有機會延續坤哥傳奇。不過，ToNick嘅《長相廝守》呼聲都極高！

2.剛宣佈懷孕嘅方皓玟，亦憑《假使世界原來不像你預期》殺入「我最喜愛歌曲」五強，仲係五強中唯一女將，過去一直默默耕耘。今年10月一連兩場《方皓玟My Spiritual Live》成績斐然。等你發圍喇！

3.入行……更正，係「成立」30周年嘅李克勤，今晚除有份爭「我最喜愛男歌手」、「我最喜愛歌曲」之外，《失魂記》亦殺入叱咤十大，有望爭男歌手獎同至尊歌曲大獎。之前李克勤於《勁歌》被網民嘲「同後生仔爭獎」，又感謂自己一直唔係商台杯茶：「一直都因為我嘅歌曲比較商業，佢哋係年輕人電台，我喺嗰邊成績都唔係太好，希望今年可以能夠有一點點小小進步。依家係商業社會，唔係幾個人可以解決。」如果克勤今晚真係拎到男歌手嘅話，今次會係克勤「成立三十年」以嚟，第一次拎叱叱男歌手金獎。

4.側田李克勤陳柏宇林奕匡爭叱咤樂壇男歌手獎，陳柏宇林奕匡比數好接近，兩人都有六首上榜歌，側田首《不經不覺》及《幸福止痛》人氣極盛，但以挾三首冠軍歌嘅克勤暫時看高一線。

5.女歌手方面，《天敵》衛蘭呼聲最高，Gin Lee、方皓玟同王菀之比數亦相當接近！

6.組合方面，ToNick竟然不入叱咤樂壇組合，而Supper Moment 《靈感床》、Rubber Band及C AllStar緊隨其後。

7.最後最後，就係商台app嘅問題。年年網民為咗睇叱咤直播費盡心思，上親商台個HongKong ToolBar一係入唔到，一係索性開唔到。至於佢個app，由晚上近7點開始，不少iPhone用家都話一開就彈app，Android用戶就話冇問題！

開唔到app嘅可唔可以俾個like！