又名莫天才嘅韋斯咸領隊莫耶斯出師不利，禮拜日首度領軍作客屈福特即淨吞兩蛋，未能助球隊脫離降班區。由於表現未有起色，好多槌仔幫粉絲都喺twitter鬧爆球會高層所托非人，仲有人留言「呢場波已經證明莫耶斯搞到韋斯咸仲衰過之前」，相信莫天才喺韋斯咸嘅路將會更難行。
韋斯咸喺上一輪聯賽主場以1:4大敗予利物浦嗰陣，好多球迷睇到一半就走，留低嘅多數都係喝倒采。今場亦都唔例外，韋斯咸粉絲唔單止狂「開汽水」，仲帶埋橫額到場，話班球員唔配着起件韋斯咸波衫，仲要求班球會高層快啲走人。
對於班球迷嘅反應，莫天才就唔係幾開心：「我唔知班粉絲之前經歷過啲咩，同埋佢哋點解會咁嬲。不過我都好感恩，因為佢哋都好支持我哋。我哋球會需要團結，而我都明白佢哋（粉絲）受到委屈。」但班球迷似乎唔多受，紛紛喺twitter留言鬧爆佢搞衰韋斯咸，「莫耶斯究竟有冇試過成功做到一樣嘢？」、「我唔清楚佢係咪真係好過比歷」。
至於今場嘅賽果，莫天才話球隊表現需要好大提升，又指摘隊中某啲大牌球員：「有啲大牌球員令到我有啲失望，佢哋要證明呢啲名氣係點嚟。」

西布朗炒普利斯

莫耶斯喺韋斯咸可以教幾耐真係唔敢講，不過日前又有英超教頭丟烏紗。近10場英超不勝嘅西布朗，球會喺周一決定炒領隊普利斯魷魚，成為英超今季第五支易帥嘅球隊！而今夏嚟到香港踢英超亞洲盃嘅四支球隊，當時嗰四位領隊，只係剩番利物浦嘅高路普仲在位，其餘法蘭迪保亞，奇治莎士比亞同埋普利斯已經Bye bye。據報北愛國家隊主帥米高奧尼爾，最有機會接任。