【新增短片】
堆填區子民有口福喇！壹傳媒飯堂今日兩個新營辦商─華星冰室同鏞記進駐。燒味部由鏞記揸旗，老師傅即場製作燒鵝同叉燒，首日試業帶咗12隻鵝嚟，午市啱啱開始，大約12點半已經賣走咗好幾隻。其他食物由華星冰室包辦，種類相當多，常餐、飯餐係指定動作，午餐咖喱豬扒飯配埋靚燉湯只售28蚊，平均30蚊以內有交易，每日仲會有一款素食餐，經理話，希望大家唔使揸車出去食飯，留返喺公司都有好嘢落肚呀！

鏞記董事甘先生今朝專程到場打點，佢話燒味如果預先製作就唔好味，所以堅持嚟到先至燒製，現場全部都係有幾十年經驗嘅老師傅。事關壹傳媒有補貼，出面賣緊70蚊嘅單拼叉燒飯，呢度只需要33蚊，想食燒鵝就由40蚊起跳。八方嘅同事率先試咗燒鵝拼肥燶叉飯，賣相非常不俗，食後感就有啲玄：「肥燶叉真係好肥同好燶，咬落脆口」，咁即係點呢？簡單嚟講，即係好食。