吳鎮宇、王菀之、袁富華、余迪偉等今日在荃灣出席百老匯愛情音樂喜劇《First Date》記者會，席上，王菀之透露今次一人兼4職，包括出品人之一、監製、劇本翻譯和演員，她說：「大家好支持，做好多嘢先可以搞得成，因為喺香港搞音樂劇唔係咁容易嘅事。」問她花了多少時間將劇本翻譯？王菀之說：「頭一轉用咗兩個星期，不過改咗4次先send畀導演同演員，導演話翻譯劇係邊排邊改。」她表示這個音樂劇將於8月底假演藝學院公演13場。

提到王菀之身為出品人之一，問到投資多少錢時，吳鎮宇代她表示價值不斐。是否重金禮聘？吳鎮宇說：「我唔辜負大家就算喇！其實之前我同中間傳話嗰個人講，我唔再做舞台劇，因為冇乜得着，因為我想合作嘅人可能唔再做，又或者已經入咗某啲劇團，機會少咗，如果要做，不如做音樂劇啦，結果菀之搵到嚟。」

鎮宇又說：「估唔到菀之一個人將成件事搞起嚟，令我大開眼界，原來有個音樂總監、唱歌老師、排舞師，仲有Live Band，其實所有嘢加埋，的確係觀眾嘅一大喜訊，因為好少獲得咁嘅觀賞經驗，而我就更加又驚又喜，可能一下唔覺意會連累好多人，所以我都好畀心機去完成呢張空頭支票；我冇乜壓力，因為我份人唔識驚，有冇睇《難兄難弟》？我怕乜啫，而且又有專人指導，唔好自己犯蠢就應該冇問題，其實我本身好鍾意關於音樂嘅電影，華人社會上好少，唯有喺舞台上完成自己嘅心願。」

會否擔心有否足夠體力去應付日、夜場？鎮宇說：「你喜歡嗰樣嘢，就唔會抗拒，因為唔係人哋強迫你，同埋舞台呢樣嘢好神奇，你唔使預先準備好多嘢，因為由零開始，跟住一字一句圍讀，然後再去思考對手嘅反應，我睇文字唔會記得好多嘢，但一圍讀就記得好多。」王菀之瞪大眼睛說：「咁快？我連100字都未記得喎！」吳鎮宇說：「讀完差不多記得，半年後都可以接番。」

此外，袁富華指這套劇的版權人將來港欣賞他們的演出，所以屆時定必打醒12分精神。對於吳鎮宇指自己沒有壓力，袁富華說：「係，佢好淡定，我聽過佢唱歌，佢得㗎，佢底子好，點會唱唔到；我今次都要又唱又跳，不過好簡單，雖然我50幾歲，但一直都有keep住郁下身體。」

-----------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9