【隔牆對論】
為了「支持」梁振英，大批金毛男、口罩黨周日喪打倒梁示威者，現場警察沒果斷執法，即時拘捕。
為涉嫌施襲者保釋的屯門鄉委會主席何君堯認為，周日的衝突，源於社民連、人民力量在議會內長期「無禮」抗爭在先。他不相信打人行動是梁振英指使，或許只是周邊的「熱心人」 ，想「討Boss個歡心都唔定」。
黨友被打，自己因向特首座駕擲摺凳被捕的社民連副主席吳文遠則說，從未見識過如此多的疑似黑幫力撐政府，認為將事件歸咎於社民連的抗爭文化是歪理，「咁唔通所有僭建都係（源於）梁振英搞僭建……呢啲邏輯呃阿婆就得」。
記者︰姚國雄　雷子樂

記：《蘋果》記者
何︰屯門鄉委會主席何君堯

記：梁振英周日落區，你認為是做騷還是聆聽民意？
何： 特首巡區體察民情係無可厚非，但既然話聽民意，應該要善用區議會架構，點解區議員都要排隊、輪籌？呢場唔係曼聯、唔係演唱會，畀我感覺呢個係個騷多個係工作會議。我都係上個星期三先收到區議會電郵，唔係邀請，純粹知會我哋區議員，咁你當我係乜嘢呀？
如果真係要聽民意，佢一定會安排定屯門、元朗兩個政務專員集合好啲意見先，但係冇，冇見區議員、鄉議局、鄉事委員會、村長。唔好淨係做形式上嘅嘢，話我有本拍紙簿我有乜嘢。好似西北區堆填問題，局長、林鄭已有所觸及，你落到嚟，我期望你畀我一啲解決方案，例如係咪宣佈研究一啲新嘅（處理垃圾）科技。
仲有，你200幾個警員護駕，我覺得過份咗，係唔需要。 （如果我）作為一個特首，我對警方好有信心。唔好話元朗，我去沙頭角、旺角、北角、牛頭角，我都會好有信心。我去見市民，點解要如臨大敵？我會請追擊我嘅市民，入嚟我度，我同你傾，你有乜嘢唔高興，我直接面對你。
記： 場外挺梁大漢毆打反梁示威者，你有何感覺？
何： 政府有一班佢嘅fans，咁嗰啲fans，所謂叫做Boss郁吓隻手指，周邊好多人都唔知乜嘢事，但可能會好enthusiastic（熱心），會諗好多嘢嚟討個Boss歡心都唔定。我哋讀過《楊修之死》都知啦，曹操諗吓嘢，楊修以為知道晒，於是越俎代庖，最後你叻過頭咪出事囉。同一個理由之嘛，嗰個天晴邨裏面，喂，特首落嚟喎，你保皇黨想營造個氣氛好，又要確保個環境秩序會掂，其他人咪會諗好多辦法，出發點好，但可能手法做錯晒呢。
（晒馬）好不智，但我唔覺得會係政府（安排）。社會好多元，有啲人都可能好捧阿特首場，好想做好啲嘢畀佢領吓功都唔定。我唔會相信特首自己親自指揮、安排呢啲嘢出嚟。仲有，如果我落區，我使乜嘢行後門？我對自己警隊有信心，我就行大道，我唔使驚你人民力量、社民連，我最好企定喺度，你攞凳嚟掟我囉！你行埋嚟十呎，已經有人保護我，我使乜嘢要閃！
記： 是否相信有黑社會介入政治？為何他們這樣暴力？
何： 點解會有咁嘅事情發生？冰封三尺非一日之寒。你喺議事堂，見到有種暴戾、有種不正常氣氛，啲人態度偏激，手指指住係咁鬧，你用咁嘅語言暴力去攻擊人。禮義廉恥，我哋聽過有啲政黨俾人話係無恥，因為佢哋只有禮義廉。但係有啲連個起步點「禮」都冇，係無禮在先，佢有冇義，我唔清楚，不斷分裂。
記：但他們的底線是非暴力。
何： 語言暴力，你認為係咪暴力呢？周日嗰個係一個令人非常非常之唔高興嘅景象。但你試諗吓你走去旺角，四處挑釁，唔好話走去元朗啦。點解會衝破咗語言暴力呢條線咁耐而冇人去檢討？咁打人更加係唔啱啦。

記： 你是新界人，可否解釋一下他們的心態，是真心挺梁，挺到不惜打人？還是收了「柯打」要做嘢？
何： 新界人比較單純。有時動粗可能係一種率性。佢哋係幾有安排，呢個安排為咗乜嘢？各有睇法，但大家要小心求證。
記：警察執法是否不公平？
何： 我覺得警方今次好恰當，佢分隔兩批人，我覺得呢個做法妥善，唔通你掹槍呀？係咪要採取鎮壓、防暴隊咁，一早如臨大敵？（記：但沒即時拘捕）當時第一件事，要保持秩序，分開佢，係必定要做。係咪逮捕，𠵱家應該係逮捕緊。喺嗰個環境，差人會有佢哋嘅戰略，如果（即時逮捕）招致更嚴重衝突呢？可能當日主要目的係協助特首聽意見，人有衝突最緊要停止咗佢（衝突），犯法嘅日後再追究。警方追究泛民坐馬路，有啲都唔係即日拘捕。
記： 但周日的現象，是否以暴力壓制反對聲音呢？
何： 我相信唔係咁樣，如果係，就好黔驢之技啦。政府要好細心檢討吓，如果畀到廣泛市民有咁嘅睇法呢，要急急澄清。歷史上，國民黨倚仗青幫；清末，你自己清兵唔夠砌要用義和團，呢啲唔係好嘢。但𠵱家未至咁樣，𠵱家未有證據話特區政府落咗柯打去叫啲人做嘢。

mailto:[email protected]

相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24