鄧穎芝、崔碧珈、貝安琪同張紋嘉今日喺九展出席電影《單身又如何》特別場,講到今日係情人節,鄧穎芝表示約咗張紋嘉睇戲兼食飯,之後再同一班朋友過,當中有男有女,但單身嘅佢,就揚言想快啲搵到男朋友,鄧穎芝話:「新年逗利是,屋企人話『下,你仲收!』,但係單身就有呢個權利,不過我都心急結婚生BB,因為今年31歲,都幾趕時間。」
鄧穎芝透露想搵個夠成熟又岩key嘅男仔,有冇打算參加極速約會?佢話:「唔夠膽試,我身邊有朋友試過,但男仔就唔符合我哋標準,一係成熟得滯,一係甩頭髮。」
至於單身嘅崔碧珈就表示今晚回家過,佢話因為冇男仔約,又feel唔到有人追緊自己。問佢心唔心急搵男朋友?佢話:「我唔心急,今年雖然27歲,但屋企人冇畀壓力我,而且我妹妹好快結婚,到時睇下兄弟團啱唔啱眼緣。」