贊助呢個舉動，竟然會惹風波？但查實只要身份同情況適合，又唔使緊張會贊助出大頭佛！一向係單車發燒友嘅新鴻基執行董事郭基煇（Adam），最新就贊助咗中國洲際單車隊Mitchelton-BikeExchange，一切都好順理成章。

點知唔只出錢，Adam仲要出埋力，近日一盡地主之誼，帶一眾車手到飛鵝山踩車，而喺山腰出發時，Adam仲同車手打賭，話要鬥快踩到山頂，但就要人哋讓佢早5分鐘出發，聲言車手若唔能夠快過佢到終點，就要退隊喎！結果約20分鐘，Adam終點在望，但10個車手竟然一支箭從後超越佢衝線噃，Adam自稱「踩到牙血都出晒」，但都鬥唔贏，笑住質疑班車手係一齊放水，「夾埋喺終點前過我！」

Adam話好希望呢支車隊成績愈來愈好，未來亦可以有香港車手加盟，希望自己嘅支持，能夠幫助中國及香港單車人才發展，一圓大家嘅單車夢。

新地冠名贊助嘅香港國際場地盃則喺本周六開幕，佔主場之利嘅香港隊會喺呢個賽事爭取世界排名積分，並為爭取世界盃、世錦賽，甚至奧運入場券鋪路。李慧詩、張敬樂同梁峻榮等港將將會出戰，Adam話到時一定現身支持，為港隊打氣！