杜莎夫人蠟像館為慶祝開幕15周年，新增香港獨有嘅功夫永久主題專區，蠟像人選由上年入場人士投票選出，最終決定打造武打明星李小龍、甄子丹、成龍同楊紫瓊蠟像，亦設有3個互動遊戲包括木人樁同屏幕模擬習武，畀參觀者試打真功夫。

台旅客最like成龍

蠟像館市場及銷售總監游萌話喎，「好多人都鍾意Jackie Chan」，而展館設計參照傳統禪院，向中國武術致敬之餘，亦希望吸引較喜歡功夫電影嘅東南亞旅客入場。原來蠟像館入場人數喺去年10月因內地遊客減少而開始下跌，近期先至稍稍回升。
台灣旅客許太噚日就帶同仔女到蠟像館參觀，佢話好喜歡功夫專區，7歲嘅囡囡因為睇過成龍主演嘅電影《警察故事》，所以展區內嘅蠟像中，最like就係成龍。
本地客亦係蠟像館招手對象，館方特別推出團體尋寶遊戲，喺8個選區設有任務，參加者利用分派嘅道具，限時完成任務，有機會獲獎。參加人數為10至50人，館方建議10歲以上人士先可參加，並須喺遊戲前3日通知蠟像館。