【更新回應】P圖大神真係好忙，事關日日都有人跪求佢幫忙。

最新一個就係鍾舒漫個細妹鍾舒祺。平時成日孖住家姐Jam歌嘅佢，個樣似家姐，身型都屬嬌小型，不過行為造型就出位好多，噚晚佢喺Ig又有出位作，貼咗張身長7呎高嘅相出嚟，單單條腿，照比例就已經50吋長，手臂仲粗過條小腿。真係唔使仔細咁睇，已經見到P圖過度。

不過舒祺就留言話自己係專登咁做，純粹係娛樂吓大家，仲問人「大家覺得我呢張相有冇資格開淘寶店？」似乎想笑吓淘寶網啲model個個都過度P圖。

雖然係娛賓，但依然引嚟一堆搞笑留言，「腿已米八」、「腳長但有大力水手臂」、「鍾舒祺小姐，請不要放棄治療。」 、「158 都可以p 到185」。

而《蘋果》仲搵嚟家姐鍾舒漫，佢就話：「我好鍾意同妹妹玩呢啲生活化嘅嘢，攞呢啲做話題，講吓笑，一有呢啲post就好多人留言，多回應。得啖笑，一來自己開心，二來人哋睇到開心，我哋都開心。我好想我嘅工作，加插我哋兩姊妹呢種開心嘢，我哋九成時間係無聊，唔係唔認真，只係寓工作於娛樂中。」

鍾舒祺就話：「人生實在太多嘢可以紀錄，我同家姐咁多年製造咗太多笑話，想將啲嘢記錄，可以娛樂人，娛樂自己，大家開心過活，做嘢好有壓力，唔使咁認真，生活上有好多fun可以發掘，我哋想整個channel擺啲無聊嘢上去，我哋覺得世上最有義嘅嘢就係無意義。」