【新增回應】

2010年中國小姐香港賽區冠軍趙哲妤（Uny）喺16年底未婚生咗囡囡，點知囡囡嘅生父不聞不問，最後Uny決定做單親媽咪，將囡囡湊大，仲將小魚跟母姓改名趙真羽。

做咗人母之後，Uny努力做嘢賺錢照顧囡囡，就算小魚喺1歲嗰陣，發現左耳有弱聽問題，佢都好鎮定咁安排詳細檢查兼做手術，感情嘅事隨緣，不過今日有周刊報道，Uny與一個貎似林峯、經營海產凍肉供應商嘅Him Wong喺天后拍拖撐枱腳，之後去咗超市買嬰兒用品，其間喺停車場忍唔住攬攬錫錫，狀甚溫馨。

報道仲話Uny同Him喺朋友聚會認識，認識後火速撻著，睇番佢哋兩個嘅fb，喺5月開始，見佢哋不時喺fb晒頭貼頭嘅親密合照，唔知會唔會好快又有新消息傳出呢？

Uny今日回覆《蘋果》，佢話：「大家應該還是了解中的階段，觀察一下性格是否適合，錫自己和囡囡，我都希望有天成功脫單。」

精選娛聞，喺晒《娛果》
http://fb.com/appledailyent