吳光正自從2015年退任會德豐（020）及旗下公司董事職位之後，已經好耐冇蒲過頭，不過今日聯交所權益披露顯示，佢同老婆包陪容以每股58.85元至58.72元，買入會德豐24萬股，涉及資金大約1,409萬元。今次披露主要係因為持有超過1個百分點嘅數，最新揸14.01%。

翻查資料，吳光正原來有每2年就增持1個百分點嘅pattern，對上一次有紀錄係2017年12月29日持有13%股權，2015年9月2日就持有12.01%股權；計埋家族信託48.6%股權，加埋持股已經有62.61%。

近年會德豐系有唔少私有化嘅動作，好多市場人士都覺得會德豐下一步會私有化業務重叠嘅九倉（004），唔知會唔會咁反高潮，吳光正家族首先有私有化會德豐呢？