年齡往往係女人嘅秘密，不過韓君婷日前接受《蘋果》專訪，佢主動報數現年41歲，佢認為大家上網篤一篤就呃唔到人，冇得隱瞞。

年齡冇秘密，感情狀況呢？君婷的四位胞兄全部結婚生B，獨剩佢「小姑獨處」，韓媽媽近年都放棄向君婷催婚。去年君婷喺香港出席活動自稱單身，佢當時話：「如果話冇人追咪好冇面，我全部精神放入工作，工作上認識嘅全部都係工程師同廠佬，10個有12個結咗婚，個個年紀大到要我叫Uncle（叔叔）。」事隔一年，君婷仍然single，名花未有主，「盛女婷」輕鬆話：「咁多年嚟都仲係單身，呢個係一個選擇，我享受單身，咁形式對我嚟講仲容易，我鍾意專注工作。」

重點係合適對象未出現喺君婷身邊，佢話即使嫁唔出都冇所謂：「就算我成世唔結婚，亦唔等於我失敗，婚姻唔可以界定我喺社會嘅地位，如果我未遇到，我唔需要去強求，順其自然。」君婷呢番說話絕對係「黃金盛女」嘅心聲，佢再話：「遇到叫我唔好結，我都會結。」

到底君婷擇偶條件係咪好奄尖？佢衝口而出：「我好高要求㗎，所以點解O依家仲未結婚。」君婷強調寧缺莫濫，決不將貨就價，佢堅持：「我唔會因年齡高，將要求降低，年齡越大，見世面多咗，更清楚乜嘢係得，乜嘢係no。我都恨嫁，但唔可以勉強，大家要合拍，對方對我屋企人好唔在講，佢又要健康，識照顧自己，當然....最好都靚仔。」君婷抗拒「烏where男」，幾有條件都免問，佢覺得男士儀容好重要。君婷感情隨緣，沒有拖拍，佢樂得黐實屋企人享受溫馨家庭樂，佢O依家喺香港都係同兄嫂一家生活。