側田噚晚澳門澳門威尼斯人金光綜藝館，舉行《側田命硬演唱會-澳門站》，表演嘉賓係恭碩良，兩個人除咗合唱外，仲爆肚表演棟篤笑，笑爆全場。

側田同恭碩良喺台上，分享兄弟情，仲講佢哋之間嘅趣事，恭碩良話：「有一次去北京探側田，同佢出街，佢就不斷喺街撞到朋友就雞啄唔斷，因為我唔係好識普通話，梗係唔知佢哋噏乜，但每次傾完偈，側田就同人講『din娘』，好奇怪，一直都以為係粗口，點知原來係『電聯』！」

呢件事笑到側田收唔到聲，之後側田仲大講葡文，唔好以為佢同澳門fans打招呼，因為恭碩良踢爆佢只係扮嘢亂講，但係觀眾照單全收，拍爛手掌。

演唱會後側田接受訪問，好興奮咁話：「澳門觀眾同香港觀眾一樣咁hot，一樣咁熱情，我好開心！(對澳門印象如何?)澳門女仔好靚。」

佢又話自己喺演唱會台上表現「合格啦」，因為還有進步空間，他說：「我每次上台做騷，都當係人生最後一場騷咁做，會出盡全力，之後就會嚴格地自我檢討，希望再有機會上台時會有進步。」