今屆港姐選完之後餘波未了，冠軍馮盈盈當選第二日，即被人起底話撐佔中同鍾意爆粗，又俾人鬧「妓女不如」。 （相關新聞： http://bit.ly/2ctFsx4 ）

「惹火」呢樣唔知係咪遺傳，早前有高登網民開post，貼咗一張馮盈盈同媽媽嘅合照，話覺得熟口熟面，有人只係估到ViuTV《晚吹》嘅一位女主持...等等先，《晚吹》女主持有番咁上下年紀，得「蘭子」陳淑蘭一個咋！

有網民好快就唔抵得嘴，將個話題由馮盈盈媽媽變成為恥笑啲90後連蘭子都唔識，結果冇人理過正題，淨係排住嗌交，最精警嘅係，有人用咗《家有囍事》蘭子嘅一句對白截圖：「我選過香港小姐，不過冇人記得之嘛。」夠晒應景。

介紹番，一向吱喳嘅蘭子，除咗係ViuTV主持節目，後生嘅時候都係玉女一名，喺1988年都選過港姐，仲贏到當屆亞軍同最上鏡小姐兩個獎（冠軍係李嘉欣）！講到出名嘅電影，就一定要提番《家有囍事》，佢喺床上面碌嚟碌唱：「金絲雀金絲雀，不憂吃不憂喝，甘心困玉籠。」真係似足佢嘅性格。