習副主席噚日大駕光臨，特區政府上至煲呔、下至一個PC都嚴陣以待，但百密總有一疏。喺下任特首大熱唐唐向副總滙報奧運馬術賽嘅準備工作時，馬術場地嘅一塊天花突然飛墮，仲有兩條嘢從天而降條條fing。事後奧馬公司好緊張，梗係啦，點知領導人會唔會以為連香港都有豆腐渣工程㗎？

滙報途中冧假天花

習副主席貴人出門，朝早煲呔率領三司去落馬洲接老細時，直情落狗屎咁款。雖然有人擔遮擋雨，但班友褡到眼鏡、褲腳都濕晒，但副主席架座駕一抵埗，個天又開始放晴喎，真係天公作美。到晏晝，喺沙田馬術比賽場地嘅新聞發佈廳召開滙報會，煲呔、唐唐、林煥光等坐正喺副主席對面，逐一發言，十足面試咁款。
向來有偶發性講嘢障礙嘅唐唐普通話卻日見進步，至少比煲呔勝一籌，滙報時亦冇重演「三碌拎」、「條條fing」嘅精警演繹。不過，世事難料，唐唐準備得好但個場唔爭氣，佢講講吓突然間嘭一聲，靠近記者採訪區上面成塊假天花跌落嚟，在場人士嘅目光即刻被吸引過去，兩條銀色鋁質風管跌咗出嚟，名副其實條條fing。
負責個場嘅林煥光即時黑面，但煲呔仲笑住口同佢耳語一番，唔知係咪問佢：「乜咁大整蠱呀？」考緊特首牌嘅唐唐算係臨危不亂，望咗兩條嘢一眼，笑一笑就繼續滙報，當時運高睇佢唔到。

奧運馬術公司好緊張，夜晚近8點半發聲明回應，解釋話可能有人意外撞到臨時間隔牆，先搞到塊天花支撐板鬆脫，跌咗出嚟嘅風管屬「臨時構築物」，仲強調今次純屬「小意外」一宗，承建商事後已經立即趕到現場，話維修工作唔複雜，應該好快可以修復，並且確保同類事件唔會再發生，亦唔影響建築物嘅結構咁話。
話雖如此，但喺老細面前發生啲咁嘅事，實在失策兼失禮。最驚當時扮冇嘢嘅習副主席以為香港馬術場地有豆腐渣工程，咁就大鑊。唔怪得副主席訓示煲呔對奧馬安排要親自過問，作為奧運馬術委員會主席嘅唐唐，真係要醒定啲。

mailto:[email protected]