當年今日
關於我們

  任總新馬「有錢賺」好意頭 - 李八方

蘋果日報 2002/01/02 00:00


金管局總裁任志剛買咗隻新馬,叫做「有錢賺」,英文名沿用佢喜愛嘅IN字頭,叫InTheMoney。呢個名,財經圈嘅人應該好熟悉,特別係炒期權者,一定明白InTheMoney嘅價值。

金融風暴買「白武士」
任總雖然係馬會董事,但並不多馬,除咗新買呢隻「有錢賺」,現役嘅就只有同積金局總裁夾份養嗰隻「有計」。之前佢同任錦光養過三隻馬(見附表),除「自己友」有啲表現,後兩隻都可以講係買錯貨。好彩佢咁有錢,唔志在啲獎金,只係冇得拉頭馬冇得威。
講起改名,金管局最近個填字遊戲英文版有一條問題問任總啲馬鍾意用乜嘢字頭,應該就係In字。除咗隻WhiteKnight(威將名駒),全部都係In,連佢堂大佬任錦光自己養喺希斯馬房隻「攞彩」,英文名亦叫Incredible。
改名係一門高深學問,Insider在金融界係一個敏感嘅字,但任總八九年就用咗。九七年金融風暴爆發,佢就整隻WhiteKnight(直譯:白武士)出嚟,究竟邊個係「白武士」?九八年佢指揮入市行動,舉世嘩然,佢就左手Intrigue(直譯:密謀)右手Intervene(直譯:干預)大有「你吹咩」之意。現在時勢唔好,當然「有錢賺」最緊要。

「聯繫滙率」唔講得笑
八方記得有次同任總講起啲馬,席間有人笑謂,任總咁支持聯繫滙率,點解唔改隻馬叫做「七點八」或者「DollarLink」呢?任總笑笑口話真係有咁諗過,不過後來唔制,唔係因為冇得「In」,而係擔心隻馬跑唔出,引起誤會;且萬一隻馬流鼻血要退役,咁咪大吉利是?
除咗任總,另一位馬會董事葉錫安亦自購咗隻新西蘭新馬,養在約翰摩亞馬房,叫做OliveorTwist,中文叫「獨攬乾坤」。
照計孖士打之內,冇人同佢爭啫。


E-mail:[email protected]