亞姐早排舉行過兩次公開面試，參賽者騎呢百出，質素超低，要搵個標青女都甚有難度。不過噚日大會正式公佈打入香港賽區嘅13位入圍佳麗名單，結果騎呢佳麗全部消失，連曝光率極高嘅「凸肚陳奕詩」梁詠瑜、梁洛施師妹藍燕、曾喺電影《金錢帝國》中扮過陳奕迅老婆嘅姜紫藍等都冇影，反而突然多咗三個從未曝光，又樣貌正常嘅佳麗，明顯拉高咗啲質素。

新面孔來頭勁

呢三位佳麗中，有兩個出身自選美賽事，包括23歲嘅1號姚佳雯，佢學歷好高，報稱係碩士學生，曾喺2004中華小姐總決賽奪最具人氣獎、及2006亞洲小姐競選內地華南賽區冠軍，至於24歲嘅3號朱樂芯，都有大學學歷，仲係2006年紐約華裔小姐季軍；最後一位就係19歲嘅11號鮑康兒。
亞姐突然有新女亮相，自然令人聯想係質素唔掂，大會四處物色較好樣嘅參賽者補飛，但亞視方面解釋，話之前曾有好幾次面試，只係其中有兩次安排傳媒採訪，嗰三位佳麗喺非傳媒採訪嘅面試中已出現咁話喎。
另一方面，順利過關嘅佳麗仲有「岩石胸Monique」12號袁小曼、13號吳建豪妹妹姚鳳鳳、加國電視台主持7號顏子菲、2號譚麗思、4號李佳霖、5號周婉婷、6號涂勁枝、8號徐妮雅、9號康小蜜同10號葉泳萱。呢13位準亞姐下周一將見傳媒，10月底會選出四位佳麗，再加8位內地佳麗、7位海外佳麗及1位澳門代表，加埋共20位一齊參加12月舉行嘅總決賽。