佑威國際（627）收0.255元，大升11.8%。呢隻股票，靜咗成年，今次發力，唔簡單。
由去年10月開始，佑威就以0.225元為中軸上下浮動，噚日以大陽燭搶到高收，唔單止拋離10日、20日同50日平均線（同在0.225元），仲升穿長期下降軌，而成交更大增到4580多萬股（係16個月嘅高紀錄），確認中期調整完成，再起升浪。
再睇周線圖，過去4年，佑威股價在0.20元至0.40元間上落，形成長方形徘徊區，今次升勢再起，可以0.40元為初步上升目標。
佑威係以服裝產銷、貿易同納米加工3線發展，新鮮熱辣嘅消息有兩個，第一係集團自創新品牌PEZZX專門店，及代理品牌店SEVENDAYS合共6間，已在黃金周之前分別在上海和北京開業。第二個就係有基金求貨，在市場大手吸納。
零售股概念吸引，佑威現時在中港兩地已建立龐大的銷售網絡，內地有自營店及特許經營店360家，香港有50家。服裝零售股當中，以佑威現時嘅擴展速度，好快就可晉身中大型之列，但以同業平均PE13倍計，佑威不足6倍，就着實好吸引，基金睇好，大條道理。

零售業務趨多元化

開設SEVENDAYS係佑威將服裝零售及分銷業務走向多元化重要一步，現時已與中港兩地約10個品牌簽署代理銷售協議，目標係代理30個品牌，建立毛利較高的多品牌業務，估計每年營業額可達2億元。
納米業務方面，南昌市基地現時年產量達1200萬件，第二期年底落成後，有能力向上游縱向發展，開拓紡織原材料納米處理業務。
為應付市場需求，集團已計劃在江蘇省內建立另一個納米紡織處理基地，每年可處理3000萬平方米布匹。
現年度（07年3月結），估計盈利可達1.32億元，每股盈利5仙，以仍屬偏低8倍PE計，股價可見0.40元，上升空間逾50%。
郭兆誠