哀悼趙老問題，北京終於顯示少少寬容，唔搞中央追悼會，不過會有「遺體告別式」，唔知有無中央領導人出席，但已特別恩准，送趙老入「八寶山革命公墓」！重慌死出面亂諗，話儀式簡化，係中央「規定」，級別愈高愈唔搞嘢，咁即是話，至少都唔當趙老係敵人，而係當佢係自己人！
咁樣一來，特區垃圾會一干男女政治小丑，未夠二十四小時，即時醜態現形！奴才即是奴才，可惜今次睇錯面色，以為大陸佬對趙老趕盡殺絕，急急抱住落井下石，點知又一次，佢哋買錯咗！
出咗醜，梗係想遮掩！民建聯及自由黨等親中保皇集團，見自己即時衰咗，一係就賴係詹培忠出晒主意，民建聯嘅劉華，就賴晒立法會主席范徐麗泰，死口咬定泛民主派不顧議事規條，即是違反「法治」，總之就係范徐食晒成隻死貓咁解！