日產全新車Presage貝沙，賣點係佢獨創嘅一觸式系統。除有豪華家庭車必備嘅電趟門開關按鈕外，最方便又最獨特嘅係駕駛席重設有開關中排Walk-in座椅嘅操控鍵，㩒一粒掣將趟門打開，再㩒多一粒，中排靠左座椅更會自動滑前、椅背亦會自動翻下，騰出通道供乘客進出第三排座椅。全個過程都可以喺駕駛席操控，乘客由上車到落車都唔使親自落手，實在超級體貼。另外，一觸式操控系統還包括放平車廂內嘅座椅、揭起車尾玻璃窗等功能，就算係弱質纖纖嘅女司機，一樣都可以輕鬆用盡Presage嘅各樣功能。

每次影MPV車，上車落車無數次不在話下，最慘係要影晒車廂座椅嘅不同變化。若要放平後座，又要拆掉頭枕，之後唔知拉邊條帶就揭起座位，推邊個掣又可以摺埋椅背咁，重要成張櫈拆落嚟先有較大尾箱空間，次次都搞到成身大汗手都軟埋。
今次大讚Presage夠體貼方便真係好由衷，因為無論收摺尾排、中排座椅變特大尾箱，或者將中排座椅由三座位變兩座位，所有動作都可以用一個拉掣或按鈕操控，而且重唔使將啲頭枕又拆又裝，幫車廂大變身都好慳力，整個拍攝過程都真係好舒服喎！

Presage外形穩打穩紮中都有啲Detail位，車身顏色選擇亦有7款之多，不過就唔算有乜大突破，都係一貫MPV格局，較值得提提嘅係佢嘅性能：一台2.5公升直4引擎能輸出163匹最大馬力，最大扭力更達25.0kgm，堪稱同級最強，就算坐滿8個人都依然有不俗嘅加速力，只載三兩個人時更能感受到動力無限。

趟門開關、中座Walk-in按鈕觸手可及，司機唔使落車都可以招呼中後座乘客。

引擎：2488cc直4DOHC
馬力：163ps/5200rpm
扭力：25.0kgm/3600rpm
傳動：4前速自動波，前輪驅動
懸掛：（前）麥花臣（後）多連桿
制動：（前）通風碟（後）通風碟
輪胎：215/65R16
尺碼：4840×1800×1685mm
軸距：2900mm
車重：1690kg
車輛提供：合誠汽車（28035333）

「子彈頭」Previa擁有2364cc引擎，最大馬力156匹。中排座椅可旋轉，將車廂變成流動會議室，但車價較平嘅精裝版不設電索門。
車價：$291,000

2260cc的MPV外形沉實穩重，最大馬力輸出達178匹，但扭力只有21.9kgm，遠遠不及Presage。在車廂加設DVD系統，提供更佳駕乘享受。
車價：$259,500

車廂空間極大，在中型七人車中，外形算是較年輕有活力，另外配備一套四前速半自動波箱，玩樂性更大。
車價：$239,800