由韓國影帝宋康昊夥拍劉海鎮、柳俊烈主演嘅《逆權司權》將於下周四喺香港上映。電影喺韓文名照譯就簡單名為《的士司機》，港譯《逆權司機》全因電影由宋康昊主演，宋康昊於2013年上映嘅《逆權大狀》，喺韓國獲得空前成功，今次宋康昊再演控訴昔日當權者嘅電影，片商亦刻意改名《逆權司機》。

事實上，《逆權司機》同《逆權大狀》兩位主角其實有幾分相似，同樣揭露當時總統全斗煥嘅白色恐怖，《司機》訴說一個只為賺取10萬韓圜嘅的士司機，佢一直想置身事外，當到達光州後睇到一幕幕嘅鎮壓場面，終於觸發這位父親的底線。

同樣《大狀》就以釜林事件為背景，事件係喺光州事件嘅一年後，當時自光州事件後，全斗煥不斷搜捕異見人士，唔少學生因參與讀書會而被視為「赤色分子」，更會被毒打逼認罪，宋康昊飾演嘅稅務律師亦因而大受衝擊，更冒住被秋後算帳嘅風險，決定為學生進行辯護，從此投身人權運動。而片中宋康昊所飾演嘅律師一角就正正係已故前總統盧武鉉，事件亦令盧武鉉由稅務律師投身到政治，更成為總統。