武俠小說宗師金庸（查良鏞）九九年獲前新華社香港分社副社長張浚生邀請，擔任浙江大學人文學院院長同博士生導師，張浚生離開香港後做浙大黨委書記，今年七月離職，不出半年金庸亦要拜拜，呢件事成為近日國內學術界熱話，《金陵晚報》訪問咗南京大學文學院院長董健，佢話金庸未夠班做院長，並指以其水平，連做南大歷史系副教授都唔夠資格。
金庸本月二十一號獲浙大接納辭去職務，董教授話，當年金庸係因為同浙大一位曾喺香港工作嘅領導關係良好先獲聘用，而浙大部份文科教授質疑金庸，「他的學問，當院長根本不合適。」

金庸當院長有三錯
董教授認為金庸攀關係做院長有三錯，一錯係浙大請錯人，二錯係金庸做咗院長，三錯係金庸以為自己真係夠班做院長，他指金庸嘅小說無疑好多人拜讀，但唔等於佢學術水平掂，並爆料有次金庸演講，題目為《南京的歷史政治》，董健稱由於演講內容錯誤百出，令在場學生不停哄笑，場面尷尬。呢位大講是非嘅董教授最後咁總結金庸做院長嘅經歷，「金庸本人年事已高，他辭去院長一職是很自然的事情。」
（圖）金庸俾內地教授質疑係靠關係先做到浙大人文學院院長。


傳真︰2623-9278
電郵︰[email protected]