大少林建名今日同阿囝林孝信出現喺動漫節，原來大少以往每年都會帶埋小朋友去，仲每年都會買Figure添。講起現場大班性感GameGirl同Cosplayer行嚟行去，大少就話見到有啲都幾靚，問佢性唔性感大少仲微笑點晒頭。

轉返正題喇，有傳何傲兒嘅真正目標係阿囝林孝信，同場出現嘅孝信被記者一問就即刻話：「唔回應呢啲喇」。咁惟有繼續問返老竇啦，大少就話：「咁呢個(孝信)啱佢多啲」，不過一講大少好似又想流淚咁，嚇到現場記者一驚，紛紛叫大少唔好傷心，大少就即刻話喇：「我唔係喊呀，係你哋啲燈(攝影機)照住我咋」，嘩，好彩啫~

問大少傲兒同孝信係咪啱傾啲呢？大少就話：「佢哋不嬲都係朋友，(話佢轉移目標喎)我唔知呀，我啱啱落機咋，(會唔會撮合佢哋兩個呀？)順其自然啦，佢都好乖嘅。」