農曆新年過後，屋企剩番唔少「物資」，例如利是封、揮春，有啲人就會想醃製剩低啲年桔。不過，魚類及蔬菜統營處前總經理黎國仁近來有份轉發嘅短訊，提醒大家年桔係觀賞植物，唔屬於食用品，所以未經檢測，隨便食用有風險。

大家想醃製柑桔，可以去生果店買啲柑桔嚟DIY。早幾日同中環The French Window大廚Matthieu Bonnier傾開，佢送咗一小樽自製法式醃柑桔畀費清，仲公開秘技。
先將柑桔洗淨、抹乾，然後開火煲糖水，約一公升水可放兩百克糖（糖嘅份量隨意），煮滾後熄火，跟住先放入柑桔，再放入密封容器。隔一日後，再開火煲糖水，熄火放入柑桔。如是者，重複幾日。大廚話其實重複幾多次都得，越多越香甜，仲會呈透明狀。佢話呢個屬於Slow Cook嘅法式醃製方法，可以試喺其他水果，例如士多啤梨。
大廚仲教路，可以將醃製嘅柑桔，浸喺朱古力醬，再灑啲椰絲，會更加好味。費清試過味，真係好香甜。（但睇怕卡路里都唔少吓，好邪惡，唔敢食太多。）
費清　 ＃要生計，也要生活 ＃毋忘初衷