上季失落西甲同歐聯嘅巴塞隆拿今季銳意改革，除咗有意收購國際米蘭嘅拿達路馬天尼斯外，近日亦有傳巴塞打算羅致法甲里昂嘅荷蘭前鋒迪比，不過堂堂歐洲豪門就竟然話冇錢買人。

盛傳巴塞今季有意喺前鋒線上面大執位，除咗想送走老將蘇亞雷斯之外，新帥朗奴高文亦希望羅致同樣嚟自荷蘭嘅迪比，據報迪比嘅身價約為2,500萬歐元。

不過里昂主席歐拿斯就透露，話巴塞主席巴杜美日前同佢講，巴塞上季因為武漢肺炎而收入大減30%，少咗成3億歐元收入，所以出唔起錢收購呢位26歲射手。而巴塞教練朗奴高文亦都承認，假如要買入呢位荷蘭同鄉嘅話就首先要賣走隊中部份球員套現，睇嚟巴塞今季要重建陣容都係困難重重。